ابراهيم المنيسي يكتب: اصغر ما عندنا يا خضري !!

الأحد 29/سبتمبر/2019 - 08:32 م
وان ثري| بوابة الرياضة المصرية
منذ لقاء السوبر لم ألتق صديقي وجارى العزيز أحمد الخضري، الذى استقال من الاشراف على منظومة الاعلام بناديه الزمالك.
كنت يوم مباراة السوبر لقيته خارج المسجد بعد صلاة الجمعة وسألته مداعبا : طبعا دعيت كتير لفرقتكم اليوم.. لكن معلهش مش كل الدعوات مستجابة.. ربنا لا يضيع اجر من يحسن عملا ..ورينيه فايلر اشتغل عليكم كويس جدا..وافتح تليفونك بعد الماتش علشان أطمئن عليك..او تقابلنى فى تراك النادى ( حدائق الأهرام ) انت ورئيس النادى صديقنا المهندس محمد نافع علشان اطمئن عليكما انتما الاثنين.

حاول الخضري أن يظهر واثقا لكن وشه كان جايب ألوان اسماعيلاوية..وهدأت من روعه ..وانصرفنا..!!

و بالأمس حدثنى الخضري متسائلا عن معجزة تنس الطاولة هنا جودة ومدى صحة ما يتردد عن تتويجها ببطولة الجمهورية..وقلت له : نعم سنها فقط ١٢ سنة يعنى يادوب سادسة ابتدائي.. وتم تصعيدها للفريق الأول بالاهلى وطبعا هتلعب منتخب اولا سريعا.. هنا بنت سادسة ابتدائي اللى لسه مامتها بتوصلها المدرسة ومعاها سندوتشاتها قدرت تكسب بطولة الجمهورية للكبار بعد ما فازت فى النهائي على لاعبة الزمالك الاولى والكبيرة والمصنفة الثانية على افريقيا فرح عبد العزيز.. طنط فرح يا هنا عمرها ٢٧ سنة وعندها خبرات السنين وقوة وطموح وحاجات تانية كتيرة وتركيز وقوة بدنية وتحمل وخبرات..لكن طفلة الأهلى المعجزة عملتها وكسبت فرح تلاتة صفر..ودنيا تنس الطاولة عملت لها فرح.. دى معجزة..

دى اصغر حاجة عندنا يا خضري !!