ضياء دندش يكتب: الأهلي والزمالك.. فين حلاوة زمان وكورة زمان

الكام أسبوع اللي فاتوا خلوني أتأكد وأقتنع إني لازم أكتب أحسن عما يدور في الوسط الرياضي، وخصوصًا الكروي لأنه ملئ بالأحداث اللي تستحق الكلام فيها، يمكن نفيد الناس أحسن ما إللي يسوي واللي مايسواش يزعل.



حبيت أبدأ بالكلام ده عشان إفتكرت زمان- والله يرحم زمان- لما كنت عيل صغير وكانت ماتشات الكورة بتتلعب الجمعة والأحد وكان أبويا الله يرحمه أهلاوي بحق ربنا زي الكتاب مابيقول وكان بيشيلني علي كتفه في ماتشات الأهلي وكان بيخاف عليا أروح الماتشات لوحدي.


وكان يوم الأحد بيطلع من شغله بدري ويروح الماتشات من غيري لكن يوم الجمعة كنت لما أحب أروح ماتش أعمل خطة..ألبس البيجامة وآخد من أمي الله يرحمها شلن"خمسة صاغ" واقولها هاشتري قصب ودرة مشوي وهوب أنط في الماتش.. ولو كان بين الأهلي والزمالك كنت تلاقي أهلاوي جنبه زملكاوي وقدامه أهلاوي ووراه زملكاوي وممكن يتبادلوا السندوتشات والسجاير والميه"مش معدنية طبعًا"..ولو الأهلي جاب جون الأهلاوية يتنططوا ويهتفوا والزملكاوية في مكانهم ولاحركة ولاكلمة..ولو الزمالك جاب جون الأهلاوية ولاهمسة ولانظرة.


وبعد الماتش كله يخرج مع بعضه وتحتفل الجماهير الكسبانة بطريقتها..وبالليل تلاقي لاعيبة الناديين مع بعض علي القهاوي في بولاق أو عابدين أو إمبابة أو السيدة زينب..وكنا نستني مانشيتات الجرانين تاني يوم وقد إيه كانت الزحمة الصبح علي بياعين الجرانين وكنا نقص المانشيتات ونلزقها في البلكونة او في أوضتنا.


ولاكان فيه بقي سوشيال هباب ولاألتراس مأجورين ولافضائيات تولع الدنيا ولازفت يوتيوب يكدب ويهيج الناس ولاتحفيل بقلة أدب ولاناس تقبض عشان تنافق وتشتم ولاالهبل اللي بنشوفه من بعد مؤامرة يناير.



معلش وجعت دماغكم بذكريات حلوة لكن ياتري ممكن نشوف ده دلوقتي أو بعد شوية..!!..ممكن آه بس بشروط وممكن لأه وده الأكيد لأن عندنا حاجات كتيرة لازم تتغير أولها نرجع الأخلاق في التعاملات الإعلامية والسوشيالية وبعدها كل حاجة سهلة..زمان كانت كل حاجة حلوة عشان فيه أخلاق..الله يرحم زمان وحلاوة زمان..قولوا آمين..!!



**إيه الهيصه والزمبليطة دي كلها..أشرف صبحي زار الخطيب وبعدها قابل بتوع إتحاد الكورة والمشكلة إتحلت..ليه بقي"الهري" ده..كله أبو العريف..وكله بيفتي..وكله بيلعب لمصلحته.. لكن الخلاصه إن الدولة قوية وعارفة فين المصلحة العامة وبتشغل عليها..واللي يزعل..يزعل..!!



**أهم حاجة إن الزمالك فاز علي الفريق السنغالي وصعد لدور المجموعات ومكمل في البطولة الأفريقية..واللي بيفهم كورة يعرف إن أداء الزمالك كان لازم يبقي كده لظروف كتيرة..ولاسمح الله لو كان عمل ماتش العمر وخسر كنا هانزعل..لكن الزملكاوية فرحانين..وده المهم..!!


**تركي آل الشيخ..تنازل عن كل القضايا ضد منتقديه وشاتميه..ودي من سمات الكرماء.. ودافع عن الخطيب..ودي سمات الوفياء..وبوستاته علي الفيس بوك بقت مبهرة وطبيعية.. واضح إنه بدأ يفهم الحكاية كويس ويؤكد للجميع إنه أهلاوي"طحن" ولايطيق كلمة علي الكيان أو الخطيب.. وياما قلتله "مصر والسعودية أكبر من ماتش كورة ولاغيره" وده كان كلامه من يومين..وأهلًا بيك..نورت بيتك..!!


**كل مصر بقت تستني مداخلة مرتضي منصور مع برنامج"الزمالك اليوم" وكل واحد بيسمعه بطريقته..عشان كده البرنامج بتاعه علي قناة الزمالك هايسحب السجادة من تحت الباقيين..حد عنده إعتراض..!!


**تثبت قناة "نايل سبورت" أن "الدهن في العتاقي"..بعد سحب الدوري الممتاز منها بتعرض دوري الدرجة التانية مع ستوديو تحليلي محترم ونجوم محبوبين مش محروقين..ونسبة المشاهدة ممتازة..وده بسبب مجهود اسامة البهنسي ومحمد عفيفي ودينامو القناة عبدالفتاح سالم..عرفتم ماسبيرو محتاج إيه عشان يعيش..!!


**حكاية شارة كابتن المنتخب مش مهمة قوي عشان نتكلم فيها..الموضوع يعتمد علي شخصية حسام البدري صاحب القرار ده يبقي الكابتن أو ده..!!


**الواد محمدصلاح جاب حتة جون في بطولة أوروبا بالماتش كله..تسمع صوت الناس في القهاوي تحس إنهم في الاستاد..ربنا يحفظك يابني.

**شوفوا الفرق بنفسكم..شاهدت حلقة من برنامج"أهلاوي وزملكاوي" علي يوتيوب بيقدمه الزميلان محمد القوصي "أحمر" وأحمد الخضري"أبيض بخطين"..شئ محترم قوي لمعني الإختلاف في التشجيع لكن الإنتماء والاتفاق علي حب مصر..بعكس واحد-"أونكل" علي نفسه -.. بيقول إن الكورة ممكن ترجع علاقتنا مع الدويلة اللي نص حي شبرا..تصدق ياأخينا أنا صدقت اللي اتقال عنك..!!

* الكاتب مدير تحرير جريدة الجمهورية