كوكا يتذكر والده: «عايزك ماترجعش مصر غير وانت مشرفني»

كشف أحمد حسن كوكا لاعب فريق أولمبياكوس اليوناني، دور والده في حياته الكروية، مشيرًا إلى أنه صاحب الفضل الأول في استكمال مسيرته الأوروبية.

وكتب كوكا عبر حسابه على موقع التواصل الإجتماعي "فيس بوك": "يمكن اللي هقوله ده ناس قليلة تعرفه عشان أنا مش بحب اتكلم في حياتي الشخصية، بس أنا والدي ده من غيره أنا مش حاجة ولا عمري كنت هبقي حاجة ولا احقق اي حاجة".

وأضاف كوكا: "بابا الله يرحمه من وأنا عندي ٦ سنين وداني النادي الأهلي، كان اكبر حلم له اني اطلع لعيب كورة ويفتخر بي قدام أهله وصحابه، وعلطول معايا في التمارين والماتشات ولما يكون عنده شغل ومايعرفش يحضر بيخلي حد يصور الماتش عشان يتفرج عليا بعد كدة".

وتابع: "ايوه حبه لي وانه يشوفني بلعب كورة كان حاجه تانية، كبرت وجالي عرض احتراف وهو على طول في ضهري، قال لي قبل ما اسافر كلمتين مش هنساهم لاخر يوم في حياتي ( عايزك ماترجعش مصر غير وانت مشرفني بره عايز افتخر بيك وسط اهلي ) قلت له ان شاء الله يا بابا".

وواصل نجم أولمبياكوس: "سافرت وفي اول شهر،نزلت التمرين ولما رجعت كان في مطافي وبوليس كتير عند بيتي، فبصيت لاقيت شقتي كلها بتتحرق، كل حاجه كانت عندي في الشقه راحت، كلمت بابا وقلت له انا عايز ارجع مش قادر علي الغربة واللغة صعبة وبعد اللي حصل ده يمكن ربنا مش رايد اني اكمل هنا، قال لي أنا بكرة الصبح هجيلك".

واستطرد كوكا: "بابا تاني يوم كان عندي وجايب لي لبس جديد كتير واداني فلوس عشان اجيب اللي عايزه وقال لي أنا جيت عشان افكرك أنك مش هترجع غير لما تشرفني وتشرف بلدك، انت فاكر انها سهله ؟ الي حصل ده يقويك مش يخليك تستسلم".

وأتم كوكا قائلا: "الحمد لله علي كل حاجة بس انا من غير والدي ماكنتش كملت، الله يرحمك يا اطيب واحن وارجل انسان شوفته في حياتي، كان نفسي تبقي معايا وتفرح بي، ان شاء الله نتجمع تاني في الجنة".