عضو الزمالك عن اعتذار الخطيب : مينفعش الأهلي يقع

أدلى أحمد سليمان، عضو مجلس إدارة نادي الزمالك، بتصريحات حول قرار محمود الخطيب، رئيس النادي الأهلي، الذي أعلن اعتذاره عن خوض الانتخابات المقبلة وعدم استكمال مشواره على رأس القلعة الحمراء.

وقال سليمان خلال مداخلة عبر قناة «إم بي سي مصر 1»: "الأهلي نادٍ كبير، وكابتن الخطيب هو أعلى رأس فيه". وأبدى تحفظه على توقيت القرار قائلاً: "أنا مختلف مع اللي حصل، الأهلي عنده مباراة يوم الأحد، ومينفعش في نص الموسم أو وقت حساس تحصل أمور زي دي".

وأضاف: "أنا شخصيًا تعرضت لضغوط كتير، ومقدرتش أسيب الزمالك وأمشي، الأزمات في الأندية أو المشاكل الداخلية مينفعش تبقى علنية بالشكل ده".

وبخصوص تصريحات حسام غالي الأخيرة، علق سليمان: "العضو الإداري أو أي حد في المجلس بيتقاضى راتب، ومينفعش في فترة وجوده بالإدارة يطلع يتكلم علنًا. حسام غالي شخص محترم، لكن الكلام ده يقال بعد خروجه من المجلس، ساعتها من حقه يوضح كل حاجة".

واختتم قائلاً: "اللي حصل فيه خطأ من حسام غالي وخطأ من الخطيب، ومش عايز الأهلي يتأثر لأنه ركيزة أساسية في الكرة المصرية. أنا عانيت من الوضع ده قبل كده في الزمالك، والمشهد الحالي أشبه بـ (هيصة) ولسه الأيام الجاية هتكون مليانة توتر أكتر".