ياسين منصور: عايزين نكون زي برشلونة.. وأنا أميل لفكرة المدرب المشروع

تحدث ياسين منصور، المرشح لمنصب نائب رئيس مجلس إدارة النادي الأهلي عن كواليس اختيار ريكاردو سواريش مديرًا فنيًا لـ الفريق عقب رحيل بيتسو موسيماني.
وقال ياسين منصور في تصريحات تليفزيونية: مانويل جوزيه رحل عن الأهلي بأسلوب شعر فيه أنه لم يتم تقديره بالشكل الكافي، وكنت شريكًا في مجموعة العمل التي أقنعت مانويل جوزيه للعودة للعمل في الأهلي وكلمته وهو في البرتغال قبل الولاية الثانية وقولتله عايز أعتذرلك على اللي حصل واحنا آسفين وعايزين نفتح صفحة جديدة، والراجل وافق مباشرة.
وأضاف: جوزيه شديد الاحترام وعاشرته في السفريات، وكان شخصية قوية للغاية.
وأشار ياسين منصور في تصريحاته: لم أكن أعرف ريكاردو سواريش، وعملنا معاه 2 زوم ميتينج، وكلمت جوزيه سألته عليه، فـ قالي مدرب كويس أوي، وكان فكرنا إننا عايزين نبني مشروع، ووقتها كان الدوري راح وفاضل 6 ماتشات.
وتابع: فكرنا إننا نبقا زي برشلونة يبقا عندنا أكاديمية تطلّع لاعبين للنادي لما يحصل تدهور في فترة ما، ولما يبقا عماد الفريق من أبناء الفريق فـ دا بيوفر مثلًا 50 مليون جنيه، وبيبقوا شاربين روح الفانلة الحمراء ومتعودين وعارفين النظام، واحنا جايبين مدرب أجنبي علشان يمسك أكتر من ملف خاص في النادي غير موضوع إدارة الفريق الأول، احنا محتاجين نقوي قطاع الناشئين عندنا علشان نبقي زي برشلونة كده.
وأكد ياسين منصور في تصريحاته: أنا أميل لفكرة المدرب المشروع بتطبيق سليم ومضمون النجاح، ولدي طموح في تكوين قاعدة لاعبين ناشئين على أعلى مستوى في النادي الأهلي، ولازم يبقا فيه جزء من اللاعبين من أولاد النادي وجزء مش من أولاد النادي، والمحترفين اللي هييجوا لازم هيبقوا أفضل من الموجودين.
وأتم: 70% من الشعب المصري بيشجع النادي الأهلي وبالتالي لابد أن يكون 70% من أفضل لاعبي مصر يلعبون في النادي الأهلي.